بتكلم عن قصتي مع السرطان (لوكيميا الدم )

بتكلم عن قصتي مع السرطان (لوكيميا الدم ) 

ماراح اتكلم عن معاناة العلاج والايام الصعبه لاني تخطيتها ولله الحمد لكن راح اكتب 

عن الجانب المنير منها
 

خضت  معركة مريرة  وقاسية مع مرض السرطان ، ولكن انتصرت عليه،ولله الحمد وخرجت من المعركة أكثر صلابة وقوة ونضجاً، وأصبحت شخصا آخر، يدرك قيمة الحياة ومعاناة البشر وأصبح هدفها في الحياة إسعاد ذاتها ومن حولها، وذلك من خلال انضمامي لمبادرات ايجابيه وتعاونيه، التي حولت حياتي إلى الأجمل والأنفع  ومن  تجربة مرضي كان المنطلق وبدأت مشواري في دراستي في مجال الخدمة الاجتماعية.

~بداية مرضي كانت من ابو وجه قمت من النوم الا وجهي مائل ~العصب السابع

 بعده بيومين بدت معي حراره وغثيان رحت للمستشفى وكشف علي قال الدكتور حراره طبيعية  واخذت جلسات علاج طبيعي  تدليك لوجهي واخذت مغذي وطلعت وكل يوم بعد يوم تزيد الاعراض عندي واتعب بزياده واهلي كانوا مسافرين ما في اي احد يوديني المستشفى وانا ما قدرت اسوق من التعب اللي فيني وكنت بس انتظر تخف الحرارة عشان اروح  مستوصف خاص واخذي جلسة تدليك ومغذي وارجع للبيت يروح الالم ساعتين وارتاح بعده تزيد الاعراض اكثر واكثر جلست وماكنت بعلم اهلي مسافرين ما بي اخوفهم علي واضطريت اعلمهم عشان يرجعون ورجع ابوي ومن اول ما وصل حائل كان تعبان من السفر وبسرعه وداني للمستشفى و كالعادة خذيت مغذي وتحاليل ورفضوا ينوموني بالمستشفى قالو حراره طبيعيه لين ما ضغط ابوي عليهم بالكلام بالقوة تنومونه حالته صعبه الولد وتنومت بالمستشفى اسبوع في حائل وتحاليل وكل شيء ولا اكتشفوا ان عندي لوكيمياء دم وكل يوم الالم يزود عندي وصاروا يجربون علي قالو نبي نأخذ منك خزعه من رقبتك وخزعه من صدرك ورفض ابوي يأخذونه وبعد جدال وافق ابوي واول ما دخلوا الإبرة بصدري دخلوه بالخطأ ووصلت للموت وطلعه وحاول يدخله ثاني مره لكن رفضت وقمت بضرب الدكتور من حر الالم وخطاه والى يومك هذا مكان الإبرة يضايقني لأنه دخلت بالخطأ صرت ما قدر اتحرك من شدة الالم وطلبنا تحويل للرياض وكان في دكتور شاك ان معي سرطان قال روحو لم الرياض وتأكدوا و لا تتركون الدكاترة اللي هنا يتعلمون عليه ورفعوا اوراقي للرياض وقبلوني مدينة الملك فهد الطبية

 

 واخذوني بالإسعاف معي الوالد الله يطول لي بعمره من حائل للرياض واهلي يمشون وراء الاسعاف ووصلت الرياض بسلام الحمدلله ودخلت التنويم لين ما جاء الصبح و كشفوا علي الدكاترة وتأكدوا ان معي لوكيمياء دم حاد جلست بالتنويم كنت صاحي بس علي الاكسجين عشان التنفس قال الدكتور للوالد 8 ايام لازم يعديهن ولا تتضاعف معه الاعراض اكثر ونضطر ندخله العناية وقبل لا ابداء العلاج بديت بالرقية الشرعية كان الشيخ كل يوم يجيني بالمستشفى عديت 8 ايام والحمدلله بدو معي بالعلاج الكيميائي  على ان اللي معي جرثومه بالدم 

 اذكر بداية الاسبوع يوم الاحد دخل علي الدكتور بالغرفه دخل يتطمن ويسئل عن وضعي الصحي وكانت ملامح وجهه في شي بيقوله وصدمن بالخبر قال وليد عندك النخاع مايشتغل تحتاج زراعه نخاع قلت شلون وكيف زراعة نخاع بحكم اني اول مره اسمع به قال تحتاج متبرعين وناخذ منهم نخاع ونزرعه فيك انا قلت تمام اذا كذا بجيب متبرعين هنا الدكتور قال مو اي متبرع تجيب قلت شلون! قال لازم من عائلتك يعني لازم من امك وابوك قلت صعبه مستحيل لان عندي اخ اصغر مني و7 خوات ومستحيل يتحملون الام الظهر لانه صعبه شوي بحكم اني مجرب ابرة الظهر مع الحبل الشوكي وحاولت ارفض لكن قالو لازم الشي هذا يعني مو بكيفي واحس ضاقت علي الحياة وحولوني لم فيصل التخصصي بحكم ان عنده زراعه النخاع وفحصو علي وعلموني طريقته الزراعه وكل شي ولازم تنويم شهر ولا يدخل معك مرافق ولا يزورك اي احد عشان المناعه بتكون صفر قلت الشكوى لله مالنا الا الصبر ومابعد الصبر الا الفرج المهم جو عائلتي من حائل عشان يأخذون تحاليل عليهم ويشوفون من يطابق معي 100٪ المهم طابقت معي اختي الكبيرة وقالت خلاص انا بتبرع لك وعادي راضيه بأي شي حاولت ارفض مابي اي احد من اهلي يتألم لكن ماباليد حيله المهم رجعت للمستشفى الي منوم فيه وعندي اهلي جالسين وكانت اختي تقول وليد في ايات حاول انك تقرا الايات لعل وعسى يصير شي وتهون عليك زراعه النخاع القراءن فيه شفاء للناس لكن في بعض الايات خصيصا  المهم قريت الايات الي هن سورة الفاتحه 41 مره، لاإله الا انت سبحانك ربي اني كنت من الظالمين 41 مره ، المعوذات 7 مرات، اية الكرسي 7 مرات وكان قدامي وعاء فيه ماء اقرا وانفث في الماء اهم شي لاتحط اليقين بالايات خل يقينك كامل بالله والايات مجرد سبب لشفائك واستمريت 3 ايام اقرا الايات وانفث في الماء واذا خلصت شربت من الماء وغسلت كامل جسمي وخصيصا مكان النخاع جاء يوم الخميس جاء الدكتور قال رح اجلس مع اهلك بالويكند غير جو عن المستشفى وارجع الاحد عشان تروح لمستشفى فيصل التخصصي وتبدا بزراعة النخاع عندهم طلعت من المستشفئ وانا ضايق ومالي خلق اي شي وجاء يوم الاحد ورجعت للمستشفى الصبح بدري وحللت عشان يحولوني لمستشفى فيصل التخصصي ودخل علي الدكتور  بعد ماطلع التحليل الصبح قال هاه وليد جاهز لزراعه النخاع قلت يلا الحمدالله على كل شي وفجاءه قال ابشرك وليد بعد ماخذينا التحاليل خلاص ماتحتاج زراعه رجع اشتغل من جديد النخاع من نفسه خلاص ماتحتاج زراعه وقمت من السرير لاشعوريا واحب راس الدكتور ولي مده  ماسجدت على الارض كنت ماقدر وباللحظه هذي سجدت شكر لله وبكيت من الفرحه والشفاء بالاول وبالاخير من الله لكن الايات كانت سبب بشفائي من زراعة النخاع والحمدالله على كل شي دائما 

لاحظو معي كل هالي صار وانا للحين ما عندي علم بأي شيء 

من الي قاعد يصير فيني 

 (السرطان ) ولا ادري اني مريض بلوكيميا الدم

 فقط ادري ان بي جرثومه بالدم وعلاجه الكيماوي وكل يوم اخذ كيماوي 

  وبعده بديت بابرة الظهر عن طريق الحبل الشوكي 

وبعد ما مضيت شهر من اخذ الكيماوي نزلت المناعة والصفائح عندي الى الصفر والصفائح اذا نزلت تسبب نزيف وسببت لي نزيف مع افمي وانفي لو اكح انزفت وكل يوم يعطوني دم وصفائح وهذاك اليوم انزفت فوق المعدل الطبيعي واستدعوا الاستشاري وحضروا عندي يمكن 5 دكاترة مع الممرضات يالله وقفو النزيف سوت لي تنظيف مع انفي وحطت فيه قطعة قماش فيها مادة كيمائية قالت اسبوع وتتحلل بالانف و الحمدلله بديت استجيب للعلاج ووقف النزيف ولو ان اللي بانفي سببت لي مضايقة بالنفس لكن الحمدلله وكان وقته قرب وقت عيد الأضحى وكنت كل يوم اقوم اناظر للسبورة قدامي كم مناعتي ونتيجة تحاليلي كانوا الممرضات كل صبح تكتب لي النتائج على السبورة وكنت ودي ترتفع مناعتي قبل العيد لآنه صفر واخذت اسبوعين وهي صفر واول ايام العيد تعبت شوي انه عيد وفرح وانا لي شهرين بالمستشفى لكن الحمدلله ثاني ايام العيد ارتفعت المناعة عندي يعني ارتفعت اقدر اطلع من الغرفة واتمشى لو تحت بالحديقة واشم هواء واغير جو عن الغرفة ويقدرون اهلي واصدقائي يزوروني لان الزيارة كانت ممنوعه عني فترة نزول المناعه 

 

 

وبعد ما مضى اسبوع من العيد قال الدكتور خلوه يطلع يومين معكم للشقة يغير جو لان الجمعة والسبت ما كانو يعطوني كيماوي هذاك الاسبوع لان كل اسبوع له بروتوكول خاص بالعلاج وفعلا فرحت اني بطلع من المستشفى قالوا يومين ويرجع بس تغيير جو له وطلعت وجلست اليوم الاول ومن بكرا تعبت ماقدرت اتحمل وقلت رجعوني لغرفتي بالمستشفى ورجعت لهم واخذت مسكنات وارتحت الحمدلله بعد 3 شهور من التنويم بالمستشفى قالو لازم تعلمونه بمرضه ان معه سرطان ودخلت علي اخصائية تثقيف الصحي قالت تعرف انت ليش هنا قلت معي جرثومة بالدم وبس ترا بوقته كأنه شيء اغشي علي من الله ماصرت اعرف باي شيء عشان ما تألم المهم قالت انت معك لوكيمياء دم والكيماوي يقتل الخلايا السليمة والخبيثة ومن الكلام انا بوقته ماكنت اعرف شيء اسمه لوكيمياء دم مصطلح( مستشفى) الي نعرفه كلمة سرطان بمجتمعنا المهم قعدت تشرح لي عن المرض قلت اي فهمت طلعت من عندي على اساس اني فاهم الي قاعد يصير فيني واهلي كذا يظنون اني فاهم وتقبلت المرض ودخل علي الدكتور بعده وقال بعطيك اجازه تطلع تغير فيها جو مع اهلك وترجع للمستشفى انا بوقته فرحت قلت هانت بطلع وبجي موعد وخلاص يعني وصارت جلسات الكيماوي لمده شهرين يوميا بالعيادة وانا بالشقة اروح اخذ الجرعة وارجع الشقة

 

 المهم طلعت وجالسين بالشقة مع اهلي وفرحانين والوضع جدا طبيعي وجت مكالمه للوالد من عمي يسأل ويتطمن وكان ابوي موصيه على اوراق يزينهن من صحه حائل قال ابوي رح لمهم وقل الولد معه سرطان وابوه معه بالرياض لان ابوي موكل عمي بالأوراق هنا انصدمت صدمة قوية قلت من قالك ان معي سرطان !!ما معي سرطان ابوي كان يعتقد اني ادري وانصدم قال شرحت لك الأخصائية  عن وضعك قلت لا ما معي سرطان ودخلت للغرفة قعدت ابكي وافكر من هنا بدت معاناتي مع السرطان  صار التفكير عندي مو طبيعي قعدت افكر يا ربي ليش معي سرطان وش سويت ذنب عشان يجيني سرطان بدا يقل الوازع الديني عندي وصار كل تفكيري يا ربي وش سويت عشان تبليني ،عاد قعدت فتره على حالي كذا وصرت بعد افتح قوقل وابحث عن اعراض السرطان ويطلع لي اعراضه الا وهي غثيان وان الواحد لازم يحترق من داخل من الكيماوي وتصير اخلاقه تعبانه من قبل كنت اخذ الكيماوي و ما تصير معي الاعراض هذي لكن من بعد ما قريت خلاص كأنه تبرمج عندي اذا اخذت كيماوي لازم يجيني غثيان واقعد استفرغ بعد كل جلسة كيماوي  لين ما صاروا اهلي ينصحوني و صاروا كلهم حولي  وهم من اول ما قصروا معي وحولي لكن انا بديت استوعب وافهم وقعدت اقراء قرآن واهتم بأذكار الصباح والمساء وبديت افكر قلت انا تعديت مرحله من السرطان ليش ما اكمل واصبر واحتسب الاجر وما بعد الصبر الا الفرج

 

 وصرت بعده اتنوم اسبوع واطلع اسبوعين عند اهلي لمده شهرين وكنت ارفض مرافق معي عشان اعتمد على نفسي واقوي من نفسي وصرت كل يوم اعيشه بيومه مافكر ابد وش يصير معي بكرا لين ما نتظر خبر من الدكتور انه خلاص يا وليد وقفنا عنك الكيماوي صرت بس انتظر متى يقوله لي الدكتور وقعدت على الحال اتنوم اسبوع واطلع اسبوعين لين ماعديت 4 شهور وبعده اعطوني فتره راحة وسمح لي الدكتور اطلع الى اهلي برا الرياض وكنت متحمس للجيه مشتاق لحائل وبنفس الوقت خايف اني اتعب جلست تقريبا اسبوع بحائل ورجعت للرياض وصرت اخذ الكيماوي يوميا بالعناية اليومية وكل اسبوع ابره بالحبل الشوكي

 

واستمريت شهرين وبعد كل شهر يعطيني الدكتور اجازه اسبوع اروح به لحائل اتنفس وارجع اكمل علاج وجاء رمضان وصارت الجلسات مرتين بالأسبوع وكنت شايل هم كيف افطر برمضان واذكر  فيه مسجد قريب من سكني يصلي فيه الدكتور والشيخ خالد الجبير كلمه ابوي عشان يقول لي انه عادي تفطر ترجع تصومهن بعدين بس اهم شيء الصحة والعافية و الحمدلله تيسرت الامور واعطانا الدكتور اجازه اسبوعين عشان العيد ومشينا لحائل قبل العيد باربع ايام واول الايام كان وضعي طبيعي لكن اخر يوم برمضان بديت اتعب على الخفيف بألم فضيع برجولي لان الكيماوي اللي كنت اخذه يستهدف الاعصاب  وكنت اقدر اتحمله لكن تعبت ليله العيد الساعه 2 بالليل زاد الألم برجليي صرت ماقدر اوقف عليهن ابدا اذا وقفت تلقائي اطيح احس مافي شي اقدر اوقف عليه من شدة الالم ابكي بقوة وقلت بصبر واتحمل عشان ماخرب على اهلي بأول ايام العيد وصرت اقولهم مابي شي يروح الالم لين ماجاء صلاه العيد لبست وبروح اصلي صلاه العيد وفجأة سقطت من شدة الالم وقعدت ابكي واتصلو على ابوي من صلاه العيد قالو تعال وليد تعب وجاء ورحت المستشفى بحائل اعطوني مسكن وهدت الامور عندي شوي وطلعت لم اهلي بالبيت وجلست اول يوم من العيد تمام ما فيني شيء بس الم خفيف وجاء فجر ثاني ايام العيد ورجع الالم اشد من اول وبقوه والله من شدة الالم صرت ادعي يارب خذ روحي ولا توريني الالم الي اعيشه وقعدت ادعي خلاص شفت الموت وانا حي ورجعت للمستشفى واعطوني مسكن ما نفع ومسكن ثاني ولا نفع اهلي على طول حجزوا لي للرياض على أقرب رحله كانت الساعة وحده الظهر لانه كان وقت العيد ولاحصلنا اسعاف يمشي بي للرياض بدري جلست بالمستشفى عشان المسكن لين قرب موعد رحلتي وطلعت للبيت وبعده للمطار  تعبان خلاص ما قدر اتحمل والله حتى دموعي نشفت من كثر ما بكيت  ولا نمت من يومين وابكي بقوه بالمطار وبالطيارة ابكي من شدة الالم ما راح عني ابد لين ما وصلت الرياض ورحت للمستشفى الي اتعالج فيه وعلى طول دخلوني واعطوني مسكن والله من شدة الراحة الي ارتحت على طول نمت راحة ما نساه  عاد هذي من المواقف الي صارت معي من الكيماوي انه بأي لحظه تسقط وتتعب وجلست بعده يومين بالرياض  لين ارتحت وتحسنت ورجعت لحائل اسبوع وبعده رجعت للرياض اكمل علاجي وجلست شهر كيماوي وطبعا كل جرعه اخذ الكيماوي لازم اتعب فيها وماحب اكلم احد وانا توي مأخذ جرعه والغثيان والاستفراغ صارشيء اساسي عندي لكن بوجود ابوي وامي واهلي حولي كانوا يخففون عني كثير

 

 وبعده حولوني للعلاج الاشعاعي 20 يوم كل يوم جلسة اشعاعي على منطقة الراس وبعده رجعت على الكيماوي واستمريت سنتين كيماوي كل شهر جرعه وحده وابره بالحبل الشوكي وكان الي يتعبني حيل ابرة الحبل الشوكي بعض الايام تصير خفيفة ما في اي الم وبعض الايام اذا خذيت الابرة اجلس يومين ما قدر اتحرك ولا امشي من شدة الالم الي بظهري وجلست سنة على الوضع هذا كيماوي وابرة ظهر ويوم كملت سنتين دخلت بالسنة الثالثة وقفو عني ابره الحبل الشوكي واستمريت كيماوي مره بالشهر وكانت الفترة الي امر فيها بأي لحظه اتعب واي لحظه اطيح فيها الم الكيماوي كان ماله وقت محدد اطيح واتعب باي لحظه

 

وكل ماله تتحسن حالتي وصرت اخذ كيماوي خفيف ولا يأثر علي بقوة استمريت سنه الي هي اخر سنه لي بالكيماوي  والحمد الله يارب انتظرت وصبرت وكل يوم اقول هذي اخر جرعه كيماوي لي لين ماجت مكالمه من دكتوري كنت بحائل من بكرا بروح للرياض اخذ جرعة كيماوي واتصل علي قال ابشرك وليد الجرعة اللي مضت هذي اخر جرعة كيماوي تأخذه ،من شدة الفرحة ودي ادخل عليه مع الجوال واحب راسه لان بحياتي ما شفت دكتور مهتم كثر دكتوري الحمدلله اللي يسر لي الدكتور والله يحفظه يارب وحتى كنت اذكركان يقول لي بعاملك ترا نفس ما يعاملك ابوك  تعافيت من السرطان الحمدلله وصارت الان مراجعات تشييك من الدكتور وتحاليل فقط واصبح لي الان من وقفت الكيماوي تقريبا 8 اشهر ولله الحمد 

واسال الله يتم علي صحتي وعافيتي ولاتنسونا من دعائكم 

 

    « أوجه نصائح  لكل محارب/ـه سرطان بحكم تجربتي للمرض» 

• كمريض/ـه سرطان لاتدع عقلك الباطني يعتقد ان التجربة اللي مريت فيها انا ستمر به انت لكل مريض قابلية جسمه وعقله الباطني للمرض وتقبله للمرض 

•        لاتبحث عن اعراض المرض وانت غير متقبل لانك سوف تتاثر بما تقراه لاتبحث الا وانت متيقن ان قراءتك للمعلومات لاتوثرعليك بل تزيدك قوة وصلابه لتحمل المرض وتجاوزه 

• مع كل جرعة كيماوي وانت تتالم ضع كامل يقينك بالله بانه تخفيف للذنوب 

• الارادة ،الصبر، القوة ،الامل ،المواجهة ، الايمان كلمات يحتاج ان يومن بها مريض السرطان لينتصر في معركتة الطويلة مع المرض 

« أوجه رسالتي لكل محارب سرطان،  أنك ( قدها ) وتستطيع التغلب على السرطان بالعزيـمة والإرادة ولا تفقد الأمل جميعنا معك،خليك دائما متفائل وشوف مسيرة علاجك بكل امل ان نهايتها شفاء وراح ترجع احسن من اول .حتى لو جت لحظة ضعف وتعب بس راح تعدي كن قوي لان الله اختارك لمحبته لك ليختبر صبرك وإيمانك في الله  ،  قل لن يصيبنا الا ما كتب الله لنا. »

«وأوجه رسالتي لأهل المريض عليكم أن لا تفقدوا الأمل وأن تمنحوا مريضكم القوة والتشجيع؛ لأنه يستمد قوته منكم، فحاول الا تنظر اليه بعيون حزينه عامله كما تفعل دائما فقط اظهار قليل من الحب ولا ننسى أن محارب السرطان هو شخص حساس ويحتاج للإيجابية والتفاؤل،وتجنب ذكر مايسبب لهم الضيق والحزن او قول مايفقدهم الامل بالشفاء  وأشكر كل من وقف معي سواء العائلة أو اصدقائي والمجتمع والشكر الأساسي لابوي وامي الله يحفظهم لي ويطول باعمارهم ». 

سخرت جهودي لمرضى السرطان بحكم تجربتي للمرض اتقبل الجميع بصدر رحب اي استفسار عن المرض 

تويتر /Lod161

سناب /Lod161

~بعـــــد الســـرطان لاأخــــاف شيئاً ~

وليـــد صـالــح الشـــمري